“Azərbaycan ilə Tacikistan arasında diplomatik əlaqələrin otuz illik tarixi vardır. Bu illər ərzində ölkələrimiz arasında səmərəli qarşılıqlı fəaliyyət mexanizmləri qurulmuş və hər iki xalqın maraqlarına cavab verən əhəmiyyətli nəticələr əldə olunmuşdur. Diqqətəlayiq haldır ki, bu gün Tacikistanda ölkələrimiz arasında mövcud olan münasibətlərin qurulmasında Ulu Öndər Heydər Əliyevin danılmaz xidmətlərinin olduğu ehtiramla xatırlanır. Bu ehtiramın ən bariz təzahürlərindən biri də gələn ay Azərbaycan xalqının Ümummilli Lideri Heydər Əliyevin 100 illiyinin Tacikistanda da qeyd ediləcəyinin bəyan edilməsi oldu. Azərbaycan Prezidenti cənab İlham Əliyevin Tacikistana dövlət səfəri zamanı hər iki ölkənin dövlət başçıları mətbuata bəyanatla etdikləri çıxışlarında bu məqamı xüsusi qeyd etdilər. Tacikistan Prezidenti Emoməli Rəhmon böyük dövlət xadimi Heydər Əliyevlə ünsiyyətlərini hər zaman səmimiyyətlə xatırladığını bildirərək, Ulu Öndərin ölkəmiz üçün ən taleyüklü vaxtda həqiqətən öz şanlı xalqının milli lideri olduğunu və Azərbaycanı sabitlik, inkişaf yoluna çıxardığını vurğuladı. Qeyd olundu ki, cənab Prezident İlham Əliyevin Tacikistana səfəri də həm bu əlaqələrin, həm də xalqlarımızın çoxəsrlik qarşılıqlı ünsiyyət tellərinin məntiqi davamıdır”.
Azərbaycan və Tacikistan prezidentləri arasında keçirilmiş təkbətək və geniş tərkibli görüşlər zamanı qarşılıqlı əlaqələrin inkişafına yeni təkan verəcək mühüm müzakirələrin aparıldığını qeyd edərək bunları deyib: “İki ölkənin dövlət başçıları arasında gedən danışıqlar zamanı ikitərəfli münasibətlərin vəziyyəti və inkişaf perspektivləri ətraflı nəzərdən keçirilib, bir çox aktual məsələlərə dair fikir mübadiləsi aparılıb. İmzalanmış ikitərəfli sənədlər əlaqələrin hüquqi bazasının möhkəmləndirilməsinə və tamamlanmasına yönəlib. Çoxşaxəli əlaqələr kompleksinin tərkib hissələri kimi parlamentlərarası əməkdaşlığın fasiləsiz xarakteri qeyd olunub. İki ölkənin parlamentlərinin rəhbərlərinin qarşılıqlı səfərləri nəticəsində bu əməkdaşlığın yeni məzmun kəsb etdiyi vurğulanıb. Cənab Prezident İlham Əliyev bu gün Tacikistan və Azərbaycanın iki sabit dövlət olduğunu qeyd edib və bu sabitliyin inkişafın və təhlükəsizliyin əsası olduğunu vurğulayıb. Həmçinin dövlətimizin başçısı ölkələrimiz arasında bütün istiqamətlər üzrə necə irəliləmək barədə dəqiq təsəvvürlərin mövcud olduğunu bildirib. Cənab Prezident nəqliyyat-logistika sahəsinə, sənaye kooperasiyasına, investisiya layihələri ilə bağlı məsələlərə dair konkret tapşırıqlar verildiyini diqqətə çatdıraraq, Azərbaycanın Tacikistanda investisiya layihələrini ciddi nəzərdən keçirməyə hazır olduğunu qeyd edib. Əlbəttə ki, bu, bir tərəfdən Tacikistanın bizə yaxın ölkə olduğunu, digər tərəfdən isə, bu ölkədə sabitliyin hökm sürdüyünü bir daha təsdiq edir. Çünki, investisiyalar yalnız sabitlik və yaxşı investisiya şəraiti olan ölkələrə yönəldilir. Çoxsaylı xarici şirkətlər tərəfindən Tacikistanda fəal sərmayə qoyulması da ona dəlalət edir ki, investisiyalar, o cümlədən xarici investisiyalar dövlət tərəfindən qorunur. Belə qənaətə gəlmək olar ki, dövlət başçımızın səfərinin nəticələrinə əsasən ən yaxın vaxtda konkret addımlar atılacaq. Cənab Prezident İlham Əliyev hökumətlərarası komissiyanın növbəti iclasının bu il Tacikistanda keçirilməsinə dair razılığa gəlindiyini, bu iclasa qədər nəqliyyat-logistika qarşılıqlı əlaqələri, investisiya siyasəti, sənaye kooperasiyası məsələlərinə dair nümayəndə heyətlərinin üzvlərinə verilmiş bütün tapşırıqların yerinə yetiriləcəyinə və bu nəticələrin sevindirici olacağına əminliyini bildirib.”
Fəridə Qurbanova,
YAP Neftçala rayon təşkilatının fəal üzvü